Consensu Academiae impressum.

C. Vesselofski,

Academiae secretarius perpetuus.

Die tertio mensis Maii 1860.

Typis Academiae Imperialis Scientiarum Petropolitanae.

INTRODUCTIO.

Bibliotheca speculae Pulcovensis ad annum 1854 usque ita increverat, ut conclave, in quo tum temporis exposita erat, non amplius sufficeret. Necessitas inde orta est ejus in alterum locum transferendae. Atrium octogonale, quod parietes turrem magnam fulcientes cingit, maxime proposito idoneum sese obtulit. Quae jam loci mutatio ansam praebuit etiam systematis et catalogi et expositionis paululum emendandi. Etenim catalogi anno 1845 editi ordinatio non amplius auctis bibliothecae divitiis respondebat. Auxilio reliquorum speculae astronomorum adjutus, pater, W. Struve, qui, pro eximia sua ad studia bibliographica animi dispositione, ab initio peculiarem semper bibliothecae condendae et augendae curam voverat, denuo rem aggressus est, eamque ita promovit ut anno jam 1856, ex Academiae scientiarum decreto, catalogus auctus prelo exprimi coeptus sit. Editio haec catalogi secunda promisso respondet a patre in fine introductionis in catalogum anno 1845 editum expresso. Prioris illa catalogi editione consilium bibliothecae astronomicae, quantum liceret completae, in specula nostra creandae insigniter sane adjutum est, quippe qui catalogus ab astronomis, bibliophilis et bibliopolis bene acceptus, in variis Europae terris multorum virorum auxilium provocavit. Speramus fore ut viri docti novam hanc catalogi nunc multo locupletioris editionem simili benevolentia recipiant et comitentur.

Pater vere 1857 peregrinatus, pro absentiae tempore curam operis edendi mihi mandavit. Quae cura producta est cum ille post reditum gravissimo morbo correptus esset, quem quidem, Deo juvante et bona corporis indole, perfecto demum annis 1858 et 1859 se